"مین بیر اؤیکو" ادبی یاریشی

بیر اولان تانرینین آدییلا

"مین بیر اؤیکو" یاریشینین بیرینجی دؤورونده اوستونلوک قازانمیش اوچ حیکایه آشاغیداکی کیمی سونولور:

1 ـ ایلک باخیشدا، روایت باخیمیندان کئچمیش ناغیللارا بنزهدییینه رغمن، چاغداش بیر اؤیکونون اؤزللیکلرینی داشیدیغینا گؤره، "مین بیر گئجه" ناغیللارینی خاطیرلایاراق بیر بیرینه توخونموش روایت پازللرینی باجاریقلا سؤیلهدییینه گؤره، آذربایجان فولکلوروندان آلدیغی بعضی گؤرونتولری سئحیرلی رئالیزم کیمی اؤیکوده گتیردییینه گؤره، آجی بیر ساتیرایا قاپیلیب اوخوجونو اینجیتمهدن قوتیک دورومدان قروتئسک دوروما گئدیب چاتماسینا گؤره، اووسونلانمیش کاراکترلرین اؤیکو اوزره آلینیازیسینی گوجلو سویهده گؤستردییینه گؤره، او بیری حیکایهلره نیسبت تعلیق تکنیکیندن اوغورلو یارارلاندیغینا گؤره، بیر ده دیل قورولوشونون ساغلاملیغینا گؤره، حامد احمدینین "توتماتورا" آدلی اؤیکوسو بیرینجی یئری قازانیر. ها بئله، هبوط آدلی ابدی ازلی روایتدن خلاق بیر سؤیلهییشی اورتایا قویدوغونا گؤره، مدرن دوروما قاپیلاراق آخرالزمان سؤیلهمی اوزره دایاندیغینا گؤره، اؤیکو دیلی تام اؤیکو قوللوغوندا اولدوغونا گؤره، حامد احمدینین "منی قالدیرین لوطفن" اؤیکوسو ایسه "توتماتورا"یا تای بیرینجی یئری قازانمیش کیمی ساییلیر.

2ـ روایتینده نئچه سسلیلیک دویولدوغونا گؤره، اؤیکونون ایکینجی بؤلومونده یئنییئتمه بیر قیزین آیباشی اولماغینی سؤیلهیرک قادینجا بیر روایت دیلینه ال تاپدیغینا گؤره، یازینین بینامتنی ماهییتینه گؤره، روایتلرین آیریلیغینی اوغورلا باش باغلاماغینا گؤره، بیر پارا چاتیشمامازلیقلاردان گؤز یوماراق اوستاوسته اؤیکو دیلینین ساغلاملیغینا گؤره، اؤیکونون ماراقلاندیران طرحینه گؤره عبدالمجید چاوشیزادهنین "پیشیکباسان" آدلی اؤیکوسو ایکینجی یئری قازانیر.

3ـ اؤیکونون ماراقلی طرحینه گؤره، اؤیکودهکی ایناندیریجی گئرچک دوروملارا گؤره، ناغیل فورماسینا قاپیلمادان آذربایجان فولکلوروندان اؤیکونون قوللوغوندا یارارلاندیغینا گؤره، شعارا وارمادان بیر پارا سؤزلری آجی ساتیرا کیمی سؤیلهدییینه گؤره، دیلینین نیسبتن آخارلی اولدوغونا گؤره مرتضا سلمانینین "آیاق ایزلری" آدلی اؤیکوسو اوچونجو یئری قازانیر. (اؤیکولریwww.1001gece.blogfa.com وئبلاقیندا اوخویا بیلرسینیز.)

بوندان علاوه، رضا فریدینین "کؤک و قیزساققیزی، بیر ده، آنا و توچا ماجرالاری" آدلی اؤیکوسو اؤزل سورئال دوروملارینا گؤره، علی عباسینین "اوچ ساعات آزادلیق" آدلی اؤیکوسو ائتکیلَندیرن طرحینه گؤره، رسول ملکزادهنین "یئددی..." آدلی اؤیکوسو آخارلی دیلینه گؤره، عادل قلیپورون "مینیش" آدلی اؤیکوسو ساده بیر طرحی چاغداش بیر اؤیکو کیمی سؤیلهدییینه گؤره، آیدین آرازین "ساعات آلتیدا دایانمیشدی" آدلی اؤیکوسو ماراقلاندیران دوروملارینا گؤره، شریف مردینین " بو منم، اؤز قوجاغیمدا!" آدلی اؤیکوسو دیل قورولوشونون ساغلاملیغینا گؤره، علیاصغر اوجاقلونون یئنی بیر باخیمدان اؤیکو سؤیلهمهیه چالیشدیغینا گؤره تقدیره لاییق گؤرونورلر.

بئلهلیکله، بو ادبی یاریشا قاتیلمیش بوتون یازیچیلارا درین سایغیلاریمیزی بسلهیرک، فئستیوالین خرجلرینی اؤدهمکده اؤز دَیرلی مادی یاردیملارینی اسیرگهمهین سایین علی نوری و آدلارینی سؤیلهمهیه اذن وئرمهین باشقا دوستلارا دا اؤز میننتدارلیغیمیزی بیلیندیریرک.

مین بیر سئوگییله: "مین بیر اؤیکو" یاریشینین ژوری هئیتی (رضا کاظمی، محمود مهدوی، آتیلا اسکندانی)

+ 87/09/19 18:51 1001 اؤیکو

دؤردونجو بیلدیریش:

الیمیزه چاتمیش یازیلارین ایچیندن، آشاغیداکی اؤیکولر ایکینجی مرحلهیه یول تاپمیشلار. سایین یازیچیلارین آدی الیفبا سیراسییلا دوزولموشدور:

1 ـ آراز، آیدین (ساعات، آلتیدا دایانمیشدی)

2 ـ احمدی، حامد (توتماتورا/ منی قالدیرین لوطفن)

3 ـ اوجاقلو، علیاصغر (کؤلگهسیز/ یوخولو)

4 ـ بابازاده، پرویز ( ... )

5ـ جعفری، سلیمان (گولناز)

6ـ جهانگیرزاده، رامین (دایاناجاقلار/ قاپی)

7 ـ چاوشیزاده، عبدالمجید (پیشیکباسان)

8 ـ رشیدی (ساوالان)، ابراهیم ( ... )

9 ـ زنگانلی، آخارسو (بیر گونده یاشادیق)

10 ـ سلمانی، مرتضا (آیاق ایزلری)

11 ـ شیرمحمدزاده، نسرین (سونسوز)

12 ـ صادق، اولدوز (کیمسهنی اویاتماق ایستهمدی)

13 ـ صلحکننده سردرود، خسرو (شووَرن آی شووَرن...)

14 ـ عباسی، علی (اوچ ساعات آزادلیق، اؤلوم یوخوسو)

15 ـ علیزاده، رضا (بؤجهیه قییمایان سونرالار آداما دا قییماز)

16 ـ غائب، اعظم (یاش دا قورونون اودونا یانیر)

17 ـ فریدی، رضا (کؤک و قیزساققیزی، بیر ده، آنا و توچا ماجرالاری)

18 ـ قلیپور، عادل (مینیش)

19 ـ قلیزاده، ربابه (اللریم هله ده گؤینهییردی)

20 ـ گونش (بیری منی چاغیریر)

21 ـ مؤذنزاده خییولو، ایلقار (تایسیز، بیر شهر گؤز)

22 ـ محمدرضایی، سارا (او قیز یوخولارینا لایلا چالیر)

23 ـ مردی، شریف (بو منم، اؤز قوجاغیمدا)

24 ـ ملکزاده، رسول (یئددی...)

25 ـ نصیری (زنگانلی ائلمان)، امیر (حیزبیلیک، ماحمود خان)

مین بیر سایغییلا: ژوری هئیتی

+ 87/09/15 2:20 1001 اؤیکو

اوچونجو بیلدیریش:

بو نئچه آیدا، ییغجام، ساده و هایکویلردن قیراق بیر یاریشین کئچیریلمهسی اوغروندا چالیشمیشیق. «مین بیر اؤیکو» یاریشینین اؤنَریسینی نئچه آی بوندان قاباق، «آتیلا اسکندانی» اورتایا قویدو. اؤنردییی دورومون بوسبوتون دئموکرات اولدوغویلا برابر، فئستیوالین بوتون خرجلرینی ده تمناسیزجا اؤزو اؤدهیهجک شرطی ایله بو ادبی یاریش آیاق توتدو. بوندان علاوه، یارادیجیلیغینین بؤیوک بیر بؤلومو فارسجا اولدوغوندان، اونون ژوری هئیتین بیر اؤیهسی کیمی الیمیزه چاتمیش یازیلارین دیل قونوسویلا باغلی دئییل، بوتؤلوکله اونلارین اؤیکو قورولوشو بارهسینده سس وئرمهیه قناعت ائتدییینه سایغییلا یاناشماق گرهکلی گؤرونور. ایندی ایسه بو دَیرلی ایشبیرلیییندن سونرا، دؤزومله بیر بیریمیزله امکداشلیق ائتمک، الده ائتدیییمیز ان بؤیوک تجروبهلردن بیریدیر.

بو قیسا آچیقلامانین آردیندا، سایین اوخوجولاردان بیر نئچهسینین ایستهدییینه گؤره، ژوری هئیتین قیسا تانیتیمی، آشاغیداکی کیمی قارشینیزدادیر:

رضا کاظمی (اردبیل، 1356). مین اوچیوز سکسان اوچده «یارپاق» قزئتی ایله سیخ امکداشلیغا باشلایاراق، آیری آیری درگیلرده او جوملهدن «یاشماق»، «آذری»، «بیرلیک»، «آلاتوران»، «بلم»، «کتاب شهرزاد»، «گونش»، «آفتاب آذربایجان» و باشقالاریندا اؤز اؤیکولرییله قیسا شعرلرینی یاییملاییر. «بوتون مزارلاردا باسدیر منی» قیسا شعر توپلوسو، اینترنت دوشرگهسینده یاییملانمیش اونون شعر مجموعهسینین آدیدیر. ایشیق اوزو گؤرموش ایلک کیتابی «لاپ او اوزاقلاردا» باشلیقلی اؤیکو توپلوسودور. ها بئله، یاخین گلهجکده یاییملاناجاق دوخسان دوققوز اؤیکوجویو تورکجهیه چئویردییی «بیر، ایکی، اوچ» آدلی اؤیکوجوک توپلوسو اونون لاپ یئنی اثریدیر. رضا کاظمی، «سونای فئستیوالی»ـنین بیرینجی دؤورونده ژوری هئیتیندن بیری ایدی.

محمود مهدوی (اردبیل، 1351). اردبیلده مین اوچیوز یئتمیش سککیزده اؤیکو کلاسلارینی قورماقلا ایندییه کیمی مختلیف یئرلرده اؤیرتمن کیمی چالیشمیشدیر. هله یاییملانمامیش «بئش بارماق» باشلیقلی رومان و «من، عظیم و لنین» باشلیقلی اؤیکو توپلوسونون یازیچیسیدیر. "اکرم اَیلیسلی"نین «منیم نغمهکار بیبیم» رومانینی، "آفاق مسعود"ـون «ازدحام» رومانینی و آذربایجان جمهوریتی ادبیاتیندان سئچیلمیش «10 سپتامبر» آدیندا بیر حیکایه توپلوسونو فارسجایا چئویرمیشدیر. پییئس (نمایشنامه) قولوندا، اردبیل بؤلگهسینده، ها بئله تهران، اصفهان، مشهد و باشقا شهرلرده ایران سویهسینده کئچیریلمیش چئشیدلی فئستیواللاردا اوتوزا یاخین اؤدول قازانمیشدیر. شعره گلدیکده، «اوتاغا سیبری یاغیر» و ایرانلا عراقین سککیز ایل ساواشینی گؤز اؤنونه توتاراق، «خیشیلداییر سینهنده بیر نئچه تانک» باشلیقلی شعر توپلولاری وار. سون مجموعه، یاخین گلهجکده تهراندا یاییملاناجاقدیر.

آتیلا اسکندانی (تبریز، 1354). ایللر بویو ادبیاتدا، اؤزللیکله اؤیکو قولوندا چالیشدیغیندان تبریزین ادبی چئورهلرینده تانینمیش بیر آددیر. شعر و اؤیکو ساحهسینده چئشیدلی اؤدوللر قازانمیشدیر؛ او جوملهدن سکسانآلتینجی گونش ایلینده حیکایه اوزره کئچیریلمیش «صادق هدایت» فئستیوالیندا اوستون اؤیکوچولردن بیری کیمی تقدیم اولونور. ادبیاتدان باشقا، عکاسی ساحهسینده اؤزل تجروبهلر الده ائتمیش، بو قولدا دا ایران سویهسینده بیر نئچه اؤدول آلمیشدیر. هله ایشیق اوزو گؤرمهمیش ایکی کیتابی وار: «چهار فصل استخوانهای خیس تو» باشلیقلی شعر توپلوسو، «مسیح دایره نداشت» باشلیقلی اؤیکو توپلوسو.

+ 87/09/15 0:26 1001 اؤیکو

ایکینجی بیلدیریش:

"مین بیر اؤیکو" یاریشینا حیکایه گؤندرمهیین واختی سونا چاتدی! (1387.9.10) بئلهلیکله، دَیرلی اؤیکولرینی بیزه گؤندرمکله بو یاریشا اعتیبار باغیشلایان بوتون یازیچیلارا اؤز درین سایغیلاریمیزین بیلیندیرمهیینی یئنه گرهکلی گؤروروک. الیمیزه چاتمیش اؤیکولری توپلادیقدان سونرا، ایکی مرحلهده سئچیلمیش حیکایهلرین آدینی قوللوغونوزا چاتدیراجاییق. بیرینجی مرحلهنین سونوجو آذر آیینین اونبئشینده، ایکینجی و سون مرحلهنین سونوجو ایسه قوربان بایرامیندا (آذر آیینین اوندوققوزوندا) بللی اولاجاقدیر.

مین بیر سایغییلا: "مین بیر اؤیکو" یاریشینین ژوری هئیتی

+ 87/09/11 0:0 1001 اؤیکو